Fiame Naomi Mataafa
Fiame Naomi Mataafa

Tali le Palemia i ni faamatalaga faatatau i le tala o le tupe a Samoa

I le polokalame faapitoa i le taeao nei a le afioga i le tamaitai Palemia Fiame Naomi Mataafa ma le Radio Samoa na ia faamalamalama ai tulaga o feutagaiga ma Niu Sila ona o ni lafoga ma ni faamatalaga a le taitai o le vaega faaupufai a le HRPP e faapea o loo talosaga le malo fou a Samoa ia Niu Sila e fesoasaoni i le tapenaina o le tala faatatau autu o le tupe a Samoa.

Na faamanino e Fiame o ia sa amata mea i faatalatalanoaga ma le malo o Niu Sila ma na ia taua “E le’o faapea o le tau tapenaina o le tala o le tupe aua o le tala o le tupe na amata tapena mai le masina o Fepuari e le Ofisa o Tupe o lona uiga o loo taatia le tala o le tupe i ana fuafuaga e pei ona masani ai.”

Na ia taua foi “O le mea sa fai ai le faatalanoaga ma le Malo o Niu Sila aemaise lava le Minisita o Tupe, o le matou fia malamalama lea i ni faiga i fesuiaiga o malo faaaogaina ai le tala o le tupe e faatino ai faiga faavae e sui mai i lea faigamalo i lea faigamalo”.

O se faataitaiga na faaaoga e Fiame o le faigamalo a le Labour i Niu Sila ina ua tulai mai e taitaia lea malo ma ia faapea “o le auala lea na vaavaai ai le Labour ina ua suia le faigamalo mai le vaega a le National talu mai le 9 tausaga na tulai mai ai o le faaogaina lea o le tala o le tupe a Niu Sila e momoli ai a latou anavatau”.

Taua e Fiame le taua o le latou faatalatalanoaga ma le Minisita o Tupe a Niu Sila Grant Robertson faatasi ai ma le Minisita o Tupe a Samoa Mulipola Anarosa Molioo ma le Minisita Lagolago ma na tuu mai ai foi se metotia e mafai ona faaoga i vaega ia o suiga mai lea paeaiga i lea paeaiga.

O le auga lea o talatalanoaga a le faigamalo fou ma Niu Sila ae le’o faapea o se talosaga i le tapenaina lea o le tala faatatau autu o le tupe a Samoa.

O nisi o mataupu na fesiligia ai le tamaitai Palemia e aofia ai ma tulaga o puipuiga o Samoa ona o lea ua toe agai Niu Sila i tapu ma puipuiga o le Koviti 19. Taua e Fiame o loo saogalemu Samoa pau aiaiga o loo talanoaina o tulaga o femalagaiga ae o nisi fesuiaiga a le malo fou o loo tumau pea.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required