Mai le to’atele o le aufaigaluega a le Malo sa lautogia e galulue i le faafoeina o le auaunaga i le sauniga o le faamanatuina o le 60 tausaga, o le feagaiga faauo a Samoa ma Niu Sila sa faia i le fale mataaga i Vailima, e leai se isi na vave tali atu i le valaau a le ta’ita’i o le Malo, i se tasi e avatu le ipu uaina e faatino ai le faamanuia a le Malo o Samoa.
O le Minisita o le aumalaga a le Palemia o Niu Sila le afioga Aupito William Sio, na ia momoli le ipu uaina mo lea vaega tāua o sauniga tetele faapea. O se tasi lea o vala sa molimauina i le po anapo i le fiafia o le 60 tausaga o le feagaiga.
A o le’i amataina foi le sauniga na fesili le ta’ita’i o le Malo i se tasi o tusitala sinia e galue i se auaunaga tuma’oti, poo fea e faamautu ai le vasega o le aufaasalalau ma tusitala o le aumalaga a Niu Sila, ona sa molimauina e tolu nofoaga eseese o le fale sa faia ai le sauniga ua nofoia uma e le vaega faasalalau ma tusitala i Samoa.
O le vaega lea o le polokalame sa tapena e le Ofisa o le Va i Fafo ma le vaega o fesoota’iga i le matagaluega a le Palemia ma le Kapeneta. O vala ia ua faaalia e se tasi o minisita o le tatou Malo, e tatau ona toe asia e faaleleia ina ia lē toe tulai mai ni faaletonu faapea i le lumanai, aemaise i taimi o taligamalo tetele.
