I se tala lata mai o le taua i Gaza ua lipotia mai ai le faia o se isi maliega i le va o itu e lua ina ia toe faaopoopo le umi o le maliega o iai nei i se isi lua aso.

O le Mediator Qatar lea ua folafola maia lea faamatalaga ma o se mapusaga mo le toatele aemaise i tagata Palesitina i Gaza.

Ua folafola foi le faasaoloto ane o nisi tagata na ave faapagota e le Hamas ma ua tuuina atu i le Red Cross i Gaza mo le toe faafoi ane i Isaraelu.

Ua faamaonia mai foi e le Fale Paepae i Amerika lea maliega ma ta’ua ai o le isi toa 20 o tamaiti ma tamaitai o le a faasaoloto mai e le Hamas ma o le avanoa foi lea o loo faagasolo ai le tuuina atu o fesoasoani tau taumafa ma mea manaomia i tagata o loo i totonu o Gaza.

O le po anapo sa faapea e faamuta ai le maliega sa faia i le lua aso talu ai lea na amata faasaoloto mai ai tagata na ave faamalosia peitai o lea la ua toe faaopoopo le isi lua aso ma o se tulaga lelei tele lea aemaise lava mo tagata i Gaza ina ua malolo ai ma osofaiga a Isaraelu.