O auala tetele o loo feoai ai taavale uma i Samoa e le o ni nofoaga e fai ai ni taaloga tau tuuga taavale, a faafoe foi le taavale ia aua ne’i e faapea o oe o Michael Schumacher le alii avetaavale saoasaoa ta’uta’ua i le lalolagi o lana taaloga lea e lelei ai tele.

O nisi ia o vaega o le faaiuga tusitusia a le afioga i le faamasino sinia o le faamasinoga sili, le afioga Vui Clarence Nelson, ina ua lau le faasalaga tai 2 tausaga i le falepuipui o Mikaele Maiava ma Talosaga Faatagi.

O le Aso Faraile na tea nei na aumai ai lea faaiuga ma ua amata tuli ai le faasalaga o i laua na molia i le solitulafono o le ave taavale faatamala ma le faatalale i se tuuga taavale i se vaega o le alatele mai Leulumoega Tuai agai atu i Lefaga ma fano ai le soifua o se alii talavou 23 tausaga lona matua.

O Novema o le tausaga e 2019 na tupu ai lea faalavelave a o Oketopa o le tausaga nei na maua ai le faaiuga a le faamasinoga i le mae’a ona suesueina molimau ma faamaonia ai moliaga o Mikaele ma Talosaga.

Ua faaalia i le faaiuga o se feau tau molimoli lea i tagata uma o avetaavale latou te soli le tulafono o le saogalemu o le alatele o le ulufale i le falepuipui pe a faamaonia ni moliaga tau taavale afi.

Ua faasā pe tapu e le faamasinoga ona toe tuuina atu ni laisene avetaavale ia i laua ua nofosala mai le taimi e magalo ai, seia mae’a ona toe auai i se aoaoga avetaavale e faatatau i le saogalemu i luga o auala.

E faatoa mafai ona toe maua o la laisene ave taavale pe a mae’a lea aoaoga ma ua faamalieina vaega uma o le saogalemu o le la toe aveina o se taavale.

Ua atoa le fā tausaga talu ona tupu le faalavelave tau taavale na molia ai i laua ua faasalaina.