Ua tafea pe ua lē pasia i totonu o le Palemene i le asō, aso 6 Mati 2025, le lafo o le lē faatuatuaina o le ta’ita’iga a le tamaitai Palemia ma lana Kapeneta, sa faatū atu e le faipule o Gagaifomauga Nu.3, le afioga i le Laaulialemalietoa Leauatea Fosi Schmidt, o ia foi o le ta’ita’i o le isi vaega o faipule e to’a 20 o le vaega faaupufai a le Faatuatua i le Atua Samoa ua Tasi.
O le i’uga o le palota tauvalaau na faatautaia, e to’a 19 faipule na lagolagoina le lafo ae to’a 32 na teena.
E to’alima sui o le itu na faatūina le lafo sa filifilia e mua’i lauga a o le’i tatala le avanoa i isi faipule o le Maota e aofia ai le ta’ita’i o le Itu Agai ma nisi o faipule mai lena itu, a o le’i lauga foi nisi o sui o le Kapeneta ae faai’u i le saunoaga a le ta’ita’i o le Malo, le afioga i le tamaitai Palemia, ma faatū ai loa le lafo mo le palotaina.
Sa vaaia lava le lagalagā o finagalo o nisi o sui o le maota i taimi o felafolafoa’iga i lauga, ae sa mausalī ma lelei le faatautaiga a le afioga i le Fofoga Fetalai, i le tau faato’ato’aina o sui usufono.
E to’alua sui minisita na faatula’i ese i fafo mai le faai’uga a le Fofoga Fetalai, o le afioga i le Minisita o Galuega Tetele ma Fela’ua’iga, ma le Minisita o Pisinisi Tuma’oti; na vave ona toe faaa’e sui minisita i totonu o le fono ina ia auai i le faatinoga o le palota mo le lagolagoina ma le teena o le lafo.
O se auiliiliga atili o lenei lipoti o le a faafofoga iai i le aso a taeao i talafou mai Samoa.
