E telē le avanoa e taaalo ai le alii talavou Samoa o Brian To’o mo le aulakapi liki a Ausetalia le Kangaroos mo le taamilosaga a le Ipu a le Lalolagi i le Lakapi Liki o le a sauni atu i ai, peitai ua lē o lea le filifiliga a lenei alo o Samoa.
I se faamatalaga a Brian To’o o loo sii i luga o le itulau fb a le The Rugby League Report, o loo ia ta’ua ai, “O le a ou ofuina le jersey lanu mūmū moana mo Samoa. O se avanoa telē lenei mo a’u ou te taalo ai mo Ausetalia, peitai e sili atu ona tāua ia te au lo’u aiga ma lo’u atunuu.” (I’m going to be putting on the red and blue jersey of Samoa. It’s a massive opportunity to play for Austalia, but my family and my people mean more.)
O Brian o se tasi o le to’a 8 mai le ‘au manumalo a le NRL premiership o le tausaga na te’a nei o loo iai le fuafuaga e taalo mo Samoa e aofia ai ma le alii o Jarome Luai ma le alii o Atephen Crichton.
E to’a 4 sui o le ‘au a le Panthers e aofia ai Charlie Staines, Taylan May, Izack Tago ma Spencer Leniu lea na taaalo i le Toa Samoa i le la taaloga ma le Atu Kuki i le masina na te’a nei.
E toatele le aofai o tama taaalo a le Panthers o loo telē le avanoa e taaalo ai mo ‘au tetele e pei o Ausetalia peitai o loo ua faamuamua le taalo mo o latou aiga e tauala atu i le ‘au a le Toa Samoa.
