O le a faasalaluina tuusa’o atu i luga o upega tafailagi le polokalame mo Kolisi maualuluga i Niu Sila le ASB Polyfest i lenei tausaga, mo le maimoaga a tagata lautele.
Talu ai ona o loo iai pea le atunuu i le lanu mumu ma le tausisi i puipuiga o le Koviti19 o le a faasalalau ai i luga o upega tafailagi polokalame o le Polyfest mo aso e 4 mai le Aso 23 – 26 o Mati lea o le a faia i le Manukau Sports Bowl.
O le a auai na’o Kolisi eseese e tauva ma faafiafia i luma o faamasino ae o le a maimoa mai aiga uo ma e masani i le tuusao atu o lenei polokalame mai o latou maota ma laoa.
Taua e le taitaifono o le Polyfest ia Robert Solomone o nei suiga e o gatasi ma puipuiga o loo iai Niu Sila i le taimi nei o le pipisi o le faama’i ma o le ala foi lea o le faaaogaina o se nofoaga o loo aiaia i lalo o puipuiga a le Soifua Maloloina.
O le faatinoga o lenei polokalame o le a mafai ona faasalalau le tele o vaega eseese faaleaganuu poo cultural stages ma o le a mataitū lelei tagata e ulufale i le nofoaga o le a faia ai lea faamoemoe mo le saogalemu.
