I suesuega a le NSW Fair Trading, le ofisa o feagai ma fefaataua’iga talafeagai i Niu Sa Uelese, ua faailoa mai i le asō o se ofisa malaga i Sini o loo taulai iai a latou susuega i le vaiaso nei ina ua tele faaseā ua faia atu faasaga iai.
O le Travel World Sydney lea e iai lona ofisa i Arncliff ua feta’ua’ina lo latou maua o le silia ma le $230,000 mai ana paaga i totonu o le 17 masina talu ai ae emo ane le ata e leai ni bookings o faia a tagata.
Fai mai talu mai Ianuari tausaga talu ai na amata agai atu ai faitioga ma faaseā e uiga i lea pisinisi, ua lē o toe talia telefoni ma ua leai se isi i le ofisa ae na o le upega tafailagi o loo iai pea.
Ua ta’ua foi i le lipoti a le 7News o loo suesue foi e leoleo a NSW lenei mataupu.
E toatele tagata ua ta’utino na faaaogā le auaunaga lea ma totogi tupe ae leai ni bookings na faia.
I lalo o tulafono faapisinisi a Ausetalia e lē tatau ona taliaina e se pisinisi ni totogi mo ni oloa poo ni auaunaga e lei faatinoina pe tuuina foi i le tagata faatau.
E lē o iai se faamatalaga mai le Travel World Sydney o ta’ua i le lipoti ae lei manuia foi taumafaiga a talafou mo se faamatalaga mai lea kamupani.
Puna o Faamatalaga: https://7news.com.au/news/travel-world-sydney-under-investigation-after-allegedly-taking-over-200000-from-customers-in-holiday-ruse-c-14849295
