O le Aso Lulu o lenei vaiaso ua suesue ai i le Faamasinoga Maualuga le talosaga a le afioaga o Leauvaa lea o loo finau ai i se poloaiga e taofia ai le galuega a le nuu o Afega.
O se talosaga foi o le a iloilo ai vaega faaletulafono pe o avanoa pea le Faamasinoga Maualuga e tagofia ai ni mataupu e faasino i le Faamasinoga o Fanua ma Suafa, e mafua ona o le pasia ai e le Palemene o teuteuga o le faavae i le tausaga 2020 lea ua ta vavae ai galuega a lea faamasinoga ma le Faamasinoga Maualuga le Supreme Court.
O loo finauina i le tali a le Loia Sili o loo tauaveina le finauga a le Faamasinoga o Fanua ma Suafa faasaga i le talosaga a Leauvaa, e lē o toe mafai e le Faamasinoga Maualuga ona toe sosofa ni faaiuga a lea faamasinoga.
E pei ona silafia ua onosefulu tausaga le matua o le faaiuga a le Faamasinoga o Fanua ma Suafa ua taoto ai le fuataga o eleele o le nuu o Afega, lea o loo talosaga Leauvaa i le Faamasinoga Maualuga e faia se poloaiga e taofia ai le galuega o loo faataoto ai tuaoi.
O le suesueina o le talosaga o loo auai ma le sosaiete a loia i le tulaga o se intervenor e pei ona sa auai foi i isi mataupu tau faamasinoga e tagofia ai le tulafono faavae o le malo o Samoa.
