O loo faagasolo suesuega a le vaega o le tineimu ma galuega laveai i taimi o faalavelave faafuasei faapea ma leoleo, o loo saili ai le mafuaaga o se mu tele i le po o le Aso Lulu, na faaumatia ai ni meatotino ma se fale i totonu o le lotoa o loo iai le fale’aiga o le Sunrise i le agai i Togafu’afu’a.
O le galuega a le au tineimu na taofia ai le sosolo atu o le afi i nisi o pisinisi tuaoi o loo latalata i le nofoaga na aafia i le malaia, aemaise o le malumalu o le Ekalesia Harvest Center.
E tuaoi lea nofoaga ma le fanua o loo iai fale o le oloa siiatoa a le kamupani a Amau na faaumatia foi i se malaia i ni tausaga ua tuanai, ma o loo iai pea ia vaaiga i le taimi nei.
O le lua ai lea o faalavelave tau mu ua tulai mai i le taulaga i Apia e vaiaso sosoo, lea e pei ona sa molimauina foi le aafia o le nofoaga sa iai le faletalavai o le Maria’s Pharmacy i le vaiaso ua mavae.
O lea mu na mafua mai i se faaletonu tau uaea eletise.
O loo tapunia pea lea nofoaga ae o le ofisa malaga o le kamupani vaalele o le Talofa Airways sa iai, ua faasee ane i se tasi o nofoaga i le taulaga le ofisa tala tupe faamomoli o le Inkpatch.
