O loo iai popolega o leoleo i se tamaititi talavou e na o le 14 tausaga le matua o loo tau sailia mai Aukilani. Fai mai leoleo o le Aso Lua o le vaiaso talu ai na mulimuli vaaia ai ma e talitonuina o loo iai i le faaitu o Counties Manukau ma e iai ona sootaga i vaega o Tamaki Makaurau.
Na ta’ua e leoleo o popolega ona e fai si laititi o le talavou ma ua talosagaina nisi e silafia ni faamatalaga e faatatau ia te ia ina ia fesootai ane.
E na o le igoa o loo faailoa mai i le lipoti o Gerred 14 tausaga ma na mulimuli vaaia o ia laeiina se mitiafu lanu uliuli, ofuvae ma seevae nike.
Na faailoa e leoleo e mafai foi ona faaaoga atu le laina 105 a leoleo poo le Crimestoppers pe a silafia ni faamatalaga e uiga i lea tamaititi.
