Ua faailoa e le ofisa o le Komesina Maualuga o le malo o Peletania i Samoa, le taliu manuia mai ai i le atunuu o se tasi o alo tama’ita’i o Samoa ua faai’uina ma le manuia lona taumafai i le faailoga maualuga o le Master mai le vaega o su’esu’ega o le faama’i o le kanesa i le iunivesite o Queen Mary i le aai o Lonetona.
O le tama’ita’i o Saouila Melissa Tolovaa e pei ona faailoa e le ofisa o lea malo i Apia, o se tasi na faamanuiaina i se avanoa sikolasipi na talosaga iai ma ia mauaina.
O se a’oa’oga ua faaalia e lea alo tama’ita’i o le atunuu sa avea o se lu’itau ia te ia, ona o lona lagona e lē to’atele nisi mai Samoa e a’oa’oina ai i ni avanoa faapea i atunuu i fafo i le tomai tau saienisi e foi manuia mai.
Peita’i o se fiafiaga tele ia te ia ina ua faai’uina ma le manuia lona taumafai ma ua faaeaina i le faailoga o le Master’s in Cancer and Molecular Pathology and Genomics.
E na o Saouila le tama’ita’i Pasefika mai Samoa sa faamanuiaina i le avanoa sikolasipi sa talosaga iai, ma o lana lu’i i isi alo o le atunuu, e mafaia mea uma pe a tuu atoa iai le loto ma faamuamua le Atua.
