E 45 tausaga le matua o le soifua o se tinā ua faamaonia lona moliaga o le avetaavale faatamala na māfua ai ona fano le ola o se tamaitiiti e 23 masina le matua poo le tasi le tausaga ma masina e 11.
O se tasi lea o faalavelave e faamomoiloto i lē ua molia ona o ia sa vaaia le tamaitiiti o le atalii o lona tuagane.
O faamaumauga a leoleo o loo faailoa ai na tupu le faalavelave i le aso 24 o le masina o Iuni o le tausaga nei i luma tonu o le fale o lē ua molia le tinā ia May Juliet Romeo.
O le va o le tasi ma le 2 i le aoauli lea sa taunuu ai i le fale le taavale o le ituaiga o le Voxy Van uliuli sa aveina e lē ua molia a o iai ma le tamaitiiti.
Na tu le taavale ona oso lea i fafo o le tamaitiiti ae faasolomuli le taavale e le tinā, sa ia lē silafia o le tamaitiiti o loo i tua o le taavale ma aafia ai loa le tamaitiiti ina ua taia i le pito i tua.
Na nanati i le falema’i peita’i na uma lona ola ma faailoa ai i le lipoti a le foma’i, e ogaoga manu’a i lona ulu ma aafia ai lona fai’ai.
I le silasila a le faamasinoga e tugā ma ogaoga le solitulafono ona e leai se laisene avetaavale o le tinā ae e le’i laiseneina foi le taavale.
Peita’i e iai faamasinoga ua taoto faai’uga e tai tutusa ma faamatalaga o le faalavelave na tupu ma molia ai le tinā ia May ma ua lē tuuina atu ai se faasalaga faafalepuipui ae ua faasala tupe e 3 afe 300 tālā.
O tuutuuga e tatau ona oo atu i le aso 10 o Tesema ua mae’a ona totogi.
A lē usita’ia le faasalaga o le a nofosala lē ua molia i le falepuipui mo le umi e 6 vaiaso.
Ua poloa’iina foi e lē tatau ona ia toe umia se foeuli o se taavale se’ia vaganā ua pasi ana su’ega ma maua lona laisene mai le pulega o feoa’iga i le laueleele.
