Ua tuuina mai le faaiuga a le Faamasinoga Sili i se mataupu na molia ai se alii i moliaga o le ave taavale faatamala ua afua ai le maliu ma o lea faaiuga na faaleaoga ma soloia e le faamasinoga.
E 16 tausaga o se teineititi na maliu ona o lea faalavelave tau taavale na tulai mai i le tausaga na te’a nei.
O lea faalavelave na tulai mai i Saleaula i le motu tele i Salafai i le masina o Fepuari 2021. O lē na molia o Netane Olomautau mai Salelavalu ma Saipipi Savaii.
O le amataga o le masina o Mati o le masina na te’a nei na valaau ai moliaga a leoleo e lagolago ai le moliaga sa tetee ai lē ua molia. Peitai o le maea ona suesue o molimau na tuuina atu ai le folasaga a le alii Loia le afioga Afamasaga Michael Soonalole sa tulai mo lē na molia ma finauina ai e leai ni mau a le itu a leoleo ua taua ai sa faatamala le aveina o le taavale na mafua ai ona taia lē ua maliu ao ia kolosi leisi itu o le auala.
Ua taua lea finauga a le alii loia o le “no case to answer”. Na talia e le faamasinoga le finauga ma aumai ai le iuga ua faaleaoga ma soloia ai le moliaga ona ua lē mafai e leoleo ona faamaonia le tuuaiga.
