O le Aso Faraile o lenei vaiaso ua tuuina mai ai le i’uga a le Faamasinoga Maualuga e tusa ma le matāupu a le alii o Esarona David Lologa 50 tausaga le soifua.
O lea ua māua e soloatoa Esarona i le falepuipui ma aiaiga e 22 tausaga faato’ā agavaa o ia poo le leai foi mo se avanoa i le palola (life imprisonment with a minimum non-parole period of 22 years).
O lenei faai’uga ua afua mai, ina ua faamaonia ona moliaga o le fasioti tagata faamoemoeina; e pei ona ia fasiotia ai ni tagata se to’alima (5) e ala i lona susunuina ma lona loto iai o se faletalimalo ua ta’ua o le Loafers Lodge, a o iai i latou nei i lea nofoaga i le masina o Me o le tausaga e 2023.
E 5 vaiaso na faasolo ai iloiloga o lenei matāupu, ma o le masina o Setema na faamaonia ai moliaga o Esarona – o le 5 o moliaga o le fasioti tagata faamoemoeina, ma le 1 o le moliaga o le susunuina o se fale ma le loto iai (guilty of five counts of murder and one count of arson).
I talaaga o le finauina e le loia o loo tula’i mo lē ua molia nei, na ia tula’i ma folasia i luma o le faamasinoga o le alii o Esarona David Lologa e iai aafiaga o le soifua mālōlōina o lona mafaufau.
Ae ua faailoa e le faamasino poo le Crown na nafa ma lea matāupu, i faamaumauga ma molimau eseese ua faamauina na faia lava ma le mautinoa gaioiga a Esarona, ma na ia iloa lava le sesē o lana faatinoga ua fai.
Ua atili ai ona mautū le faai’uga a le faamasino, ona o tala’aga a lenei alii i taimi ua tuana’i.
I le tele o matāupu ua aafia ai Esarona, e pei ona iai le silia ma le 50 o matāupu ua faamaonia ai lea tagata, ma matāupu e aofia ai lona taumafai e faaoo le oti i le atalii o se tama’ita’i sa o la nonofo faapouliuli i le tausaga e 2009 ma lona taumafai foi e susunu se fale ma le loto iai i le tausaga e 1996.
Ta’ua i lipoti i le tolaulauina o talaaga o lenei alii na faamauina ai, o le 3 vaiaso a o le’i tupu le faalavelave, na ia susunuina ai le Loafers Lodge na māua lona sola ese mai le falema’i mo tagata e iai aafiaga i le soifua mālōlōina o le mafaufau.
E ui i se finau atu o le itu tetee e tusa ai ma aafiaga o loo feagai ma Esarona, ae na manino lava le faai’uga a le faamasinoga, na ia faailoa na iloa ma malamalama lelei Esarona i le eseesega o le lelei ma le leaga e pei ona ia filifili ai lava e faaoo le oti i ē ua maliliu.
O Esarona o se alii Samoa, ma e tusa ai ma lipoti mai le leitio faavaomalo a Niu Sila, na soifua mai o ia i Ueligitone ma na iai foi le taimi na aumau ai o ia i Samoa a o le’i toe foi i Niu Sila.
Puna o Faamatalaga: https://www.rnz.co.nz/news/national/582304/loafers-lodge-fire-esarona-david-lologa-handed-life-sentence-for-murder-of-five-people
