Ua faailoa le tetee o le faitau afe o tagata faigaluega lautele i Niu Sa Uelese, public health workers ona o se folafolaga o siitaga o totogi ua lē taunuu ma ua le faamalieina ai iuni o tagata faigaluega.
Pe ā ma le 30 afe tagata faigaluega a le PSA Public Service Association e aofia ai tagata faigaluega pei o leoleo falepuipui, park rangers, tagata faigaluega fesoasoani i aoga, tagata faigaluega a le Service NSW ma tagata faigaluega sivili a leoleo o loo aofia i nei solo tetee ua faia mo le 24 itula ma ua lipotia sa faapotopoto i fafo ane o le maota o le Palemene i Niu Sa Uelese.
Ua ta’ua le faia foi o tetee i isi nofoaga i Bathurst, Dubbo, Grafton, Newcastle, Tamworth ma Wagga Wagga. Ua faia le solotetee i le mae’a o le taimi na tuuina e le PSA i le malo i le vaiaso talu ai ia tali ane ai i le 5.4 pasene o le siitaga i totogi.
Sa folafola e le malo le ponesi e 3 afe mo frontline workers a le soifua mālōlōina lea sa taliaina lelei e le to’atele peitai na faitioina e nisi ona fai mai a latou e lē o oo lea faamanuiaga i faiaoga, leoleo, aufaigaluega a le soifua mālōlōina ma le aufaigaluega lautele.
