Fai mai e faitau afe le aufaigaluega a iunivesite na savavali ese mai ma galuega i le aso ananafi ina ia lagolago ai le latou mau o loo manaomia ona faia se siitaga e 8 pasene i o latou totogi.
Na faamatala e i latou ia o loo tetee i le RNZ i le aso ananafi, o latou e galulue malosi mo iunivesite aemaise lava i le uluai lua tausaga muamua o le faamai ma ua lagona le faanoanoa ona o le mumusu o e o loo faigaluega ai e sii o latou totogi ia ogatasi ma le tulaga ua iai le tau o le soifuaga.
O le aufaigaluega i le Iunivesite a Lincoln ma Massey e aofia i iuni na faamuta la latou galulue i le tai tasi ma le tai lua itula i le taeao ananafi ae i isi iunivesite sa faatino tetee mo le ‘afa aso.
Fai mai tagata faigaluega o loo gafatia e iunivesite ona faia siitaga i totogi ma ua leva foi e lei toe iai se siitaga. O nisi o tamaiti aoga iunivesite o loo tulai mai ai tetee ua o latou faailoa e latou te lagolagoina a latou faiaoga ma le aufaigaluega.
