O se igoa ua lausilafia ma nanau i ai le faafofoga a le toatele o uo ma i latou e fiafia foi i musika a lenei alii Samoa mai Hawaii, le susuga Laga Savea. E manatua le suafa Laga Savea i ana fatuga sa iloga foi le moomia ina ua a’ea’e mai, e pei o le ‘Take Me Away’, ‘Pretty Lady’ ma le ‘Nanakuli’. E anoanoai tagata e fiafia foi i musika a lenei alii, ituaiga musika o le Poly roots/reggae.

O le asō lea na faasilasila ai le maliu o lenei alii pese mai Hawaii, ma na matauina le lolofi mai o feau faamaise i luga o fesootaiga televavave mai soo se itu o le lalolagi, aemaise lava i le Pasefika, mai uo ma paaga a Savea, e faaleo ai o latou lagona mafatia ma le faanoanoa i le motusia ai o le mafutaga ma lenei alii pese.

O Savea na soifua ane mai Nanakuli, i Hawaii, ma na amata mai lava lana taleni a o avea ma ta tagipalau (drummer) mo le kulupu a le Hot Rain. Sa galue faatasi Savea ma nisi foi e iloga i le musika e pei o Kiwini Vaitai ma SiaosiFiji, Arrested Development ma le Yellow Man.

I le 2007 na faalauiloa mai ai lana album ‘Roots Satisfaction’, o inā na amata a’ea’e mai ai le lauiloa o lenei alii aemaise ua militino faatasi ma se tasi o foi o alii pese ma tusipese lauiloa o Fiji.

Na tusi e le alii o Fiji ona saaafiafiga i le Instagram e momoli ai ona lagona faanoanoa i lana uo “I have & will always embrace you forever in my heart like my own flesh & blood go in power my beloved uso Laga Savea #forever #gamechanger.”