A’o tulata ai i le faaiuga o le tausaga 2021, o se vaitau foi ua tele ina selesele ai fanau aoga i fua o latou taumafaiga i totonu o aoga mo lenei tausaga atoa. Ua ripotia mai le suipi ai o se tamaitai Samoa ma avea ma tulaga muamua i se aoga i totonu o Suva i Fiti.
O le tamaitai o Tafaoganiu Kuniselani Elisara o Malie, Moataa ma Satupaitea ua faauuina ma faamanuiaina i le tulaga muamua poo le Valedictorian o le Aoga Maualuga a Suva Christian Community High School.
E tele ni faailoga na sola foi ma lea tamaitai e aofia ai le Faasaienisi (Science) Matematika (Maths) o le Cristian Award, Gold Star Award faapea le Best Attendance. O lenei foi tamaitai o le taitai ulu lea o le Aoga poo le Head Girl a le SCC High School.
O le tausaga e 2015 na tuua ai e lenei tamaitai ma lona aiga Samoa ae malaga atu ma faamautu i Fiti ona o le galuega a lona tina, a’o le’i tuua e lenei tamaitai le atunuu sa mua’i aoga i le Ah Mu Academy ma le Aoga maualuga a Robert Louis Stevenson i Tafaigata.
Na molimauina lenei matatia taua e aiga, uo ma e masani a Tafaoganiu ma patipatia ai ana taumafaiga o lenei tausaga faaleaoaoga ua faaiuina.
