I le 24 o aufaifaiva mai Niu Sila, Ausetalia, Amerika Samoa ma Samoa Tutoatasi na tausinio i le taamilosaga o faigafaiva faavaomalo a Samoa o lenei tausaga, ua sola le aufaifaiva o le Pure Indulgence ma le ipu o le Siamupini.

O se tausinioga ua faailoa i se pepa o faamatalaga le maualuga o le taumafai sa iai le aufaifaiva mai Samoa, e fua i le tetele ma le mamafa ona nisi o i’a sa latou maua.

E 110 le aofai o i’a na maua i le taamilosaga lea na maua ai ma ni sa’ula tetele, o wahoo ma masimasi, o i’a o le sapatū ma malauli ma ulua lapopo’a.

O le faaiuga foi o lea tauvaga o faigafaiva faavaomalo sa toe faasosola ai nisi o i’a ona e lei oo le uumi ma le lapopo’a i le tulaga e tatau ai ona faaaogā.

O le aufaifaiva ua siamupini o le a tauva i le taamilosaga foi o faigafaiva faavaomalo o le a faia i le atunuu o Costa Rica i le tausaga fou 2025, ae mo le aufaifaiva ua lē ausia ni tulaga lelei i lenei tausaga, ua toe foi e tapena mai mo le tausaga fou i le isi taamilosaga o faigafaiva faavaomalo a Samoa.