O le Kolisi o Amoa i Savaii ua sola ma le Siamupini o le lakapi a kolisi maualuluga i le vaega o alii e i lalo o le 18 tausaga le matutua, ina ua faia’ina ai le ‘au malosi a le kolisi o Sagato Iosefo.
O se taaloga na faaiu i se vevesi na mafua mai i nisi o le autapuai e aofia ai ma nisi o fanau a’oga.
O se vevesi ua ta’ua i se lipoti ua tuua’ia ai le laufali sa faia le taaloga.
O le taavale o se van a le pulega o le Lakapi Samoa sa salalau ata i luga o fesootaiga televavave na faailoa ai le afaina o le tioata pito i luma i ni maa.
Sa mafai ona maua le filemu o lea vevesi i le galuega a leoleo sa tiute i le malae o le Kolisi o Sagato Iosefo sa faia ai ia taaloga ma le sailiga siamupini i le Aso Faraile na tea nei.
O le nofoaga e faia ai lea taamilosaga i le tausaga fou o se tasi lea o vaega tāua ua tatau ona silasila iai i latou o loo tapenaina lenei faamoemoe.
I se tala mai le taamilosaga lakapi lona 5 a le faguinu o le Cocacola ma le kalapu a le Malisi Sagato Iosefo i Amerika Samoa lea sa faagasolo i le faaiuga o lena foi vaiaso, o lea ua sola mai le aulakapi taitoafitu a Siumu ma le Ipu o le Siamupini ma le faailoga tupe e 13 afe tala Amerika.
Na saili e Siumu ma le ‘au a Malisi Sagato Iosefo le Siamupini ma manumalo ai Siumu e 12 ‘ai i le 5 a Malisi Sagato Iosefo, lea ua na maua le tulaga lua ma le faailoga tupe e 5 afe tala Amerika.
O le Ipu o le Siamupini ua umia nei e Siumu o le ipu na saunia e le Kovana Sili o Amerika Samoa le afioga Lemanu Peleti Palepoi Sialega Mauga.
E tele nisi o aulakapi taitoafitu mai Samoa Tutoatasi na masii mo lea taamilosaga lakapi taitoafitu ua lima nei tausaga o faagasolo ma o se vaega o polokalame o aso fiafia o le fu’a a Tutuila ma Manu’a.
