E lē o iloa pe faapefea ona sola ese le alii o Sonny Crichton mai le vaaiga a leoleo sa vaaia ma taofia a o tālia le valaauga o lana mataupu i le tolaulauga a le faamasinoga i le aso ananafi.
O le alii o Sonny 22 tausaga o Matautu-tai na tulai i le Faamasinoga i le aso 29 o le masina na tea nei i nisi moliaga fou sa molia ai o ia e leoleo ia Tesema o le tausaga ua mavae.
O moliaga o le umiaina o laau faasāina o le mariuana, umia o fatu mariuana e 170, ma le umiaina o le paipa e ula ai mariuana.
O ia soilgatulafono sa faatino uma e lea alii a o iai o ia i le Maketi o i’a i le aso 23 o Tesema o le tausaga ua mavae.
Ma sa ia ioeina uma ia moliaga ina ua tuuina atu iai e le faamasinoga.
O lea alii e iai foi isi ona moliaga muamua o le talepe fale, gaoi ma le ave o faamatalaga sese i leoleo, sa ia teena ia moliaga ma faatulaga mai e le Faamasinoga Maualuga le iloiloina o mau ia Iulai o le tausaga ua mavae peitai e lei oo atu o ia i le Faamasinoga.
Ina ua tulai la i le masina talu ai sa poloaiina e le alii Faamasino le Afioga Fepuleai Amperosa Roma leoleo ina ia faila faatasi atu uma moliaga o lea alii.
Peitai o ananafi lea na toe valaau ai ae saili atu ua leai ma le potu sa taofia ai i le Fale Faamasino i Mulinuu.
Ua poloaiina nei e le alii faamasino se tusi saisai mo lea alii, ae na ta’ua e le tamaitai loia sa tulai mo le itu a leoleo mai le Ofisa o le Loia Sili, o se taimi muamua lea ua tulai mai ai se tulaga faapea ma o le faanoanoaga ona ua faatamala tele leoleo i le faatinoga o a latou galuega e ala lea i le lē vaai lelei o ē o loo taofia a o tālia le valaauga o a latou mataupu i le faamasinoga.
