O loo usuia i le vaiaso nei le fonotaga mo faiaoga ma i latou o loo fesootai a latou auaunaga i vaega tau aoaoga i atunuu i fafo e agai tonu i soalaupulega ma talanoaga i sailiiliga o mataupu auā le agai i luma o le pitolaau o i latou o loo feagai ma le aoaoina o alo ma fanau aoga e le gata i Samoa nei a o atunuu e mamao.

I le tatalaina aloaia ai o lenei fonotaga na avea ai le Minisita Lagolago o le Matagaluega o Aoga ma Aganuu Afioga Agaseata Tanuvasa Peto e saunoa e tusa ai ma lenei faamoemoe.

“E pei ona iai le autu o lenei fonotaga o le aoao manogi o manatu faaalia ma faasoa faatasi faafitauli a o ni metotia auā le siitia ai o tulaga o aoaoga mo fanau o le lumanai e iai lou taofi ua talafeauga lenei autu ma mataupu o aliae mai i aso nei.”

“O lo’u agavaa i le pitolaau tau faiaoga i Samoa nei e pei o isi faiaoga o loo faatinoina le auaunaga o se fesoasoani tele lea e faatonu folau ai sa’u auaunaga a o tapena ai mo le lauga o lenei faamoemoe e lua vaega tāua o le faasamoa  sa ou tomanatu ai.

“O lau tautua ma lau taitaiga, e iai le faaupuga tautua nei mo sou manuia a taeao ma o se taiala lea i le faatinoina o lo’u olaga tautua faafaiaoga.

“O la’u tautua i lou atunuu e ala lea i aotauina o alo ma fanau mo a taeao e oo mai le taimi lenei ua tofia ai a’u i lenei tofiga a le Malo o loo tautua pea e ala i le itu tau aoaoga i aoga uma a le atunuu.”

Sa faamanatu ai e le Minisita Lagolago i sui usufono le tāua o la latou pitolaau.

“Ia outou mitamita i tofiga ua outou maua o se faiaoga, o oe o loo iai le tomai tau suesuega poo se tamaititi aoga ia manatua o lou lea valaauina.

“Ia aoga lenei vaiaso e fetufaa’i ai manatu ma galulue felagolagoma’i ina ia mafai ona siitia pea le vaega o aoaoga mo alo ma fanau lalovaoa i soo se tafa o le kelope.”

O le fonotaga lenei o loo talimalo ai le Iunivesite Aoao o Samoa ma nisi o paaga mai fafo.