Search
Photo Credit: NZ Herald

So’a e le taavale a le Burger Fuel nisi o le savali o le Kerisimasi a Avondale

O se aso na fiafia le amataga ma le faagasologa o le savali o le Kerisimasi a le itumalo o Whau i Avondale i le taeao o le Aso Toonai na se’i mavae atu, ae na faafuase’i ona liua i le faanoanoa ina ua tifa atu le taavale a le fale’aiga burger o le Burger Fuel, ma taia ai nisi sui o le fa’ilipu a Avondale sa auai ma faafiafia ai i le savali.

O nisi o molimau sa vaaitino i le faalavelave na tupu, e pei o se tasi o alii sikulati sa galue ai mo le puipuiga o le saogalemu o le faamoemoe, e lei fia faailoa lona suafa, ae na ia ta’ua o le taavale lea na faavivili faataamilo e le avetaavale le taavale ma ua fai si malosi ua lē mafai ai ona taofiofi ma see ane ai loa ma taia ai nisi o tagata o le fa’ili na pito i luma.

Na fesiligia e se sui o le Radio Samoa le alii sikulati i se faamaoniga o nisi o lipoti ua agiga e faapea sa iai se faaletonu i le taavale, o le mafuaaga lea o le faalavelave, ae na tali lea alii, e lei iai se faaletonu o le taavale, ae o le mea na tupu, ua ova le taavilivili ua lē mafai ai e le driver ona control le taavale ma tulai mai ai loa le faalavelave.

I se lipoti a le 1News o loo ta’ua ai e toalua ni tagata mai le fa’ili na faatopetope atu mo ni togafitiga i le falema’i, ma nisi tagata e aofia ai ma ni tamaiti sa i totonu o le taavale lea na tupu ai le faalavelave, na aveesea mai i fafo ma faia i ai ni togafitiga i ni manu’aga mitimiti.

Na fesiligia foi le alii sikulati e tusa o nisi o lipoti e faapea na faaoolima nisi i le avetaavale ma tamaiti sa i totonu o le taavale, ae na tali le sikulati, e moni sa iai se tulaga faapea na tau tupu, ae lei iai se aafiaga tuga auā na vave ona oo atu leoleo o le saogalemu ma faato’ato’a tagata ua iai lagona ita, ma o le tulaga foi i tamaiti e foliga mai o le matuā faate’ia o tamaiti i le mea na tupu lea na oo ai aafiaga ia i latou ae lei iai se tulaga ogaoga o ni faaoogalima na faia.

O loo ta’ua i lea lipoti se faamatalaga a se tasi o sui o le Whau Local Board, o loo ia ta’ua ai lona lagona atu o le taualaga mai o le MC o le savali ina ia taofi a o lei taia tagata i le taavale lea a le Burger Fuel.

Na ta’ua se faamatalaga a se sui o le Avondale Business Association, o Marcus Amosa e faapea, e tatau i le Burger Fuel ona ta’utino le sese na fai e le avetaavale o le latou taavale, ma ia faatoese mai ma ia latou toe faaleleia mea ua faaletonu.

Na ia ta’ua, o lea na faavivili e le taavale pa’u e fai ai faailoga i luga o le auala (skid marks), ma o se popolega lea na iai o tagata lautele ona o le vaapiapi o le nofoaga sa fai ai lenei faiga lē magafagafa a le avetaavale, aemaise o lea sa tumutumu ai tagata aemaise foi o se taimi na tumutumu ai tamaiti.

Tala sili ona faitaulia

SAMOA UPDATE

TALA FOU MAI SAMOA

Keep uptodate with Radio Samoa activity & promotion

* indicates required