E silia ma le 100 visa pepelo na faasese ai e ofisa e faatalosagaina visa malaga i Thailand o latou lava tagata e omai ai i Niu Sila.

I suesuega a le vaega o femalagaa’iga, le Immigration a Niu Sila faatasi ma le fesoasoani a leoleo Thailand ua toe tautino ai le AEC Thai Development Co LTD e sese faamaumauga o teugatupe faapea tusi mo galuega na o latou faauluina mai ai talosaga na tuu mai i le Immigration a Niu Sila.

O se tautinoga ua faia ai i le mae’a ave iai o le tusi saisai e leoleo Thai ma o lea foi na toe ta’u mai ai ma le auala na faasese ai faamatalaga.

Ua maua ai foi e le ofisa leoleo i Thai, e lē gata o visa na faatalosaga mai i Niu Sila, ae faapea isi talosaga i Ausetalia, Peretania ma Korea i Saute.

O le isi ofisa na fesoasoani i faiga taufaavalea nei o le Kanthaya Translation lea na faasalalauina pepa malaga pepelo i luga o le Facebook.

O lea ua toe maua uma nei e le ofisa o femalagaa’iga a Niu Sila le silia ma le toaselau o tagata na faasese e pulega nei faamaumauga, ma o i latou foi nei sa faamoemoe e omai i Niu Sila e galulue i galuega faifaatoaga.

O loo ta’ua e le Stuff e faamatalaga mai le sui o le ofisa o femalagaa’iga a Niu Sila, ana lē vave maua nei faiga taufaasese semanu e omai iinei faafaigaluega i auala faasolitulafono ma soli ai tulafono o femalagaa’iga faavaomalo.

Puna o Faamatalaga: https://www.stuff.co.nz/nz-news/350246508/thai-agents-raided-more-100-workers-bound-nz-fake-visas