A itiiti mai pe toa 79 ua maliliu mai se faama’i fou e le o iloa tonu poo le a ae tā’ua o auga e pei o le fūlū. O se lipoti mai le Matagaluega o le Soifua Maloloina a Congo ua faailoa ai o le toatele o tagata ua maliliu e i le va o le 15-18 tausaga le matutua ae silia ma le 300 tagata ua aafia i lea faama’i.
O āuga e aofia ai le fiva, tīgā o le ulu, tafe o le isu, tale ma e iai faafitauli pe a mānava ma e masani ona vaivai le tino ma tau lē mafai ona mānava. Fai mai ua iai le ‘au su’esu’e i nofoaga o le atunuu o loo toatele ai le ‘au aafia ma su’esu’e le mafuaaga o lea faama’i.
Ua māe’a faailoa foi e le Faalapotopotoga o le Soifua Maloloina i le Lalolagi le WHO i le BBC ua aveina atu le latou team o tagata su’esu’e i le nofoaga lea mo le faia o su’esu’ega ae lelei ona lava le onosai o tagata ma faatino pea puipuiga masani i āuga e pei ona tā’ua.
Fautuaina le fufulu māmā o lima i le fasimoli ma ‘alofia nofoaga tumutumu ma ‘alofia foi le pa’i i tagata ua aafia i le faama’i se ia tau faamautū poo le a tonu le mafuaaga.
O le faaitu foi lea o Aferika sa feagai ma le pepesi ai o le mpox i le va o Ianuari ma Iulai ole tausaga nei lea e silia ma le 14 afe na aafia ai.
Puna o Faamatalaga: https://www.bbc.com/news/articles/c5y83ejz7eeo
