E silia ma le $200,000 le tupe ua faatonuina e le faamasinoga le kamupani na faapipiia le faitoto’a lea na pa’ū ifo ma taomia ma maliu ai, le tamaitai faifeau, Pastor Helen Verry, e pei ona tupu lenei faalavelave i le aso 30 o Ianuari i le 2022.
O Pastor Helen Verry, e 44 tausaga o lona soifua, na maliu i le nofoaga o le ekalesia Church Unlimited i Glendene i West Auckland, ina ua faamanu’alia a o pa’ū ifo i lalo le faitotoa taavalevale le 273kg powered roller grille door.
O Helen o ia o le uii o le fanau e to’a 15, ma o se tasi o ona tuagane o le alii lauiloa sa taalo i le All Blacks, le afioga ia Vaaiga Tuigamala, lea foi na maliu mulimuli ane i le 52 o tausaga o lona soifua, a o lei atoa se masina talu ona maliu atu si ona tuafafine.
O le tausaga e 2009 na faapipii ai e le kamupani a le Scotty Doors lea faitoto’a, ma i le tulai mai o le faalavelave na maliu ai Verry, na molia ai loa e le WorkSafe lea kamupani i lalo o le tulafono o le Health and Safety Employment Act 1992.
O le vaiaso talu ai la lea na faasalaina ai lea kamupani i le Faamasinoga Faaitumalo a Waitākere, ma poloa’iina ai e totogi le $41,250 o le sala tupe ma le isi $162,000 e totogi atu i le aiga o lē na afaina (reparations).
Na ta’ua e le ta’ita’i o le suesuega na faia e le WorkSafe, Steve Kelly e pei ona lipotia i le NZ Herald, o le maliu ai o Verry o se taunuuga mata’utia lea o le tulaga leaga o le faatinoga o le galuega na fai.
E pei ona faailoa i le lipoti, a o taumafai Verry e toso i lalo le filifili lea e faaaogā e tapuni ifo ai le faitoto’a ona e lei ola le motor lea e alu i le uila, ae faafuase’i ai ona pa’ū ifo le faitoto’a ma lavea ai.
I suesuega a le WorkSafe na māua ai ina ua taumafai le Scotty Doors e fix le faitotoa roller door, na latou faaaogā se fasi laupapa plywood ma se gib board ma ni fao vilivili e pupuu e lē gafatia ona taofi ma apoapo lelei ai le mamafa o le faitoto’a.
Na ta’ua e Kelly, ‘e lei faamautinoa e le Scotty Doors lo latou faaaogā o se fusi talafeagai e faamau lelei ai le faitoto’a.’
