Tusia – Maina Misa Fomai – Vai
E tusa ma le 1,239 le aofai ua maua e ala i latou suesuega ua aafia i le Koviti i le atunuu, talu mai le aso 17 o Mati 2022. O lea numera ua na’o le 1,200 o loo aafia pea, e le o faailoa mai po’o o le ā le tulaga o le isi 39 tagata aafia.
Ua faamauina o le 2pm i le Aso Toanai na maua ai e tusa ma le 182 tagata fou ua aafia i le faama’i. O le 97% o le faitau aofai o i latou ua aafia mai Upolu ae o le 3% e mai Savaii. Ua faailoa mai i se pepa o faamatalaga mai le Matagaluega o le Soifua Malolina ma le Komiti o Faalavelave Tutupu Faafuase’i le maualuga atu o le pasene o tamaita’i 58% ua aafia i le Koviti nai lo ali’i lea e 42%.
O le popolega tele o loo iai le taimi nei e pei ona taua e Tagaloa Robert Thomsen i le fonotaga ma Tusitala i le Aso Toanai o le siitia lea o le numera o e galulue taimua (Frontline workers) ua aafia. Ua iai se fuafuaga a le Matagaluega ina ia faaoga nisi o le aufaigaluega lava (skeleton staff) ma aoaoaina e tua iai le matagaluega mo le faatinoga o galuega seia toe malolosi nisi o le aufaigaluega ua aafia.
O le toatele o e ua aafia e mai i tausaga 15 agai i le 35. E na’o le toatolu o loo faanofoesea i le nofoaga faapitoa i le Falemai i Motootua ona o loo vaaia ai auga o le faama’i, e leai se ua maumau le soifua pe o taofia i le ICU mai ia i latou o aafia nei.
