O lipoti aupito lata mai o le faalavelave i le tuaoi o Nepal ma Saina e pei ona silasila iai le to’atele i le initaneti mai le Aso Lulu ua faailoa ai ua silia i le 150 tagata ua maliliu ma le faitau selau o loo tau sa’ilia pea e aofia ai ma tagata e silia i le 300 mai fafo atu o ia atunuu e lua ma e talitonuina e ono faaopoopo pea lea aofa’i a o faagasolo ai pea galuega lavea’i.

O lōlōga faafuase’i flash flooding na aafia ai Nepal ma Saina i le vaega tonu e masani ona to’atele turisi e aga’i iai e pei o le Mauga o Kailash i le tuaoi o atunuu e lua.

Advertisement

Ua faailoa i lipoti a le CNN o lea nofoaga e fiafia tele tagata Hindu, Buddhist, Jain ma Bonpo e aga’i iai ae o video e pei ona faailoa i luga o le social media ua vaaia ai se vaega tele o le suāvai ua aafia ai le tuaoi lea ma ua lilo ai nuu ma aafia ai i eleele solo.

Fai mai faamatalaga e malosi le eleele solo na aafia ai le faaitu lea ma poloka ai le Bhote Koshi River ua atili telē ai le aafiaga o le suāvai ua tafe ane i le tuaoi lea e pei ona maua i videos.

Fai mai e talitonu nisi o saienitisi o se vaega o poloka ‘aisa glacier na ono pa’ūū aga’i i le nofoaga lea e lē taumate ua telē ai le aafiaga e pei ona vaaia.

O loo faaauau galuega lavea’i i le taimi nei ma e lē o faigofie ona o le tele o vaega o alatetele o loo poloka aemaise o loo faaauau pea foi timuga.

Puna o Faamatalaga: https://edition.cnn.com/2026/08/26/world/live-news/nepal-flash-flooding-floods-intl