O le faatāua o le saogalemu ma le soifua maloloina i le faafoeina o soo se auaunaga tau galuega, o se autu e faatāua pea i tausaga taitasi ma avea ai o se aso faavaomalo lea e faaigoaina o le World of Safety and Health Day.

O se autu tāua mo le Matagaluega o Pisinisi Alamanuia ma Leipa auā o se tasi lea o ana manulauti tauave mo le saogalemu o tagata faigaluega aemaise o le itu i le soifua maloloina.

O lenei tausaga ua faatāua ai lea aso i ni faailoga taualoa mo fale faigaluega i le auaunaga tuma’oti le private sector faapea i galuega i totonu o le Malo.

O le tufaga faailoga la ua mae’a sa faia i le faletalimalo o Le Lava Hotel ua maua ai e le Ofisa o le Komisi o Galuega a le Malo le PSC poo le Public Service Commission office le faailoga muamua, ae tulaga lua ai le Matagaluega a le Palemia ma le Kapeneta.

O Faalapotopotoga Tuma’oti a le Malo poo State Owned Enterprises ua tulaga muamua le Faalapotopotoga o Fale, le Samoa Housing Corporation, ae tulaga lua le pulega o malaevaalele le Samoa Airport Authority.

I le vaega o galuega i kamupani ma pisinisi tuma’oti le private sector, o le Ah Liki Construction ua maua le tulaga muamua, tulaga lua o le Lucky Construction.

I le vaega o fale gaosi oloa ua tulaga muamua le kamupani gaosi sikaleti o le British American Tobacco, tulaga lua o le kamupani gaosi avamalosi o le Vailima.

I le auaunaga o tagata tafafao ua tulaga muamua le faletalimalo o le Taumeasina Island Resort, ae tulaga ai Le Uaina Hotel and Resort i Faleapuna.

I le vaega o pisinisi ma auaunaga e saunia taumafa ua maua e le fale’aiga o le Rokos le tulaga muamua ae tulaga lua le fale’aiga o le Amanaki.

O tautua faapisinisi i auaunaga tau pamu penisini ua tulaga muamua le Myna’s Service Station ae tulaga lua ai le TNT service station.

O le sili aoao poo le overall top award winner i le faatāua o le saogalemu ma le soifua maloloina i totonu o galuega ua maua lea e le Ah Liki Construction.