O le fuafuaga a le Malo aemaise le Matagaluega o Tiute ma Tupe Maua, ina ia toe tuu eseese matagaluega nei e lua. Saunoa Tuala, e telē lava le eseesega o le faatinoga o auaunaga nei e lua.

E moni lava o le vaega a le Tiute o loo mafai ona ao mai ai foi tupe maua mai tiute o oloa e auina mai totonu o le atunuu, ae pei o le matafaioi muamua lava o le Tiute o le puipuia lea o tuaoi.

E ui o loo aoina mai ai tupe mai oloa e faaui mai le malaevaalele ma le uafu i vaa o le sami, ae o le matafaioi muamua o le faamautinoa e lē o faaofi mai ai ni oloa e ono afaina ai le saogalemu o le atunuu, e pei o fualaau faasāina ma aupega e lē faatagaina e ono ofi mai totonu o le atunuu.

Ae o le matagaluega o le Revenue poo Tupe Maua, e gafa ma le tipiina ma le aoina o lafoga mai kamupani ma tagata faigaluega. E ese foi masini ma le system o loo faaaogā e lea matagaluega e ese mai le vaega a le Tiute. Aemaise foi i le tulaga o tulafono, e matuā eseese lava mo nei matagaluega e lua.

Saunoa Tuala, o le vaaiga lena a le faigamalo, afai e tuu eseese le faatinoga o vaega nei e lua, o le a faaleleia foi le aoina mai o tupe maua a le malo. O le taimi nei e tasi le CEO ae matuā eseese lava faatinoga o galuega e lua a matagaluega. Ae o le faanaunauga o le malo, ia manino lava vaega e ua’i atu i ai pulega ma faauluuluga o matagaluega taitasi.

Na fesiligia pe lē o vavevave i le faiga o nei suiga, ae na tali Tuala, e lē o vavevave le malo i ana faaiuga. O loo faaalu lava le taimi e sailiili lelei ai i auala eseese o le a faatino ai lenei suiga. O le taimi nei o loo iai le Task Force, o loo iai le Loia Sili, PSC, o loo iai foi ma le matagaluega o tupe o loo latou vaai i se faiga e fai ai le suiga; vaai poo ā ni lelei, ae pe fia foi ni tupe o le a faaalu ai lenei suiga.

O le finagalo laualuga, ina ia lava le tapenaga ina ia maua se faaiuga, e tumau, ae o se faaiuga e aogā mo le lumanai o lo tatou Malo.