O le pulega o le Lakapi Samoa o le itutino tau taaloga lea i lo tatou atunuu ua latou faailoa i le taitai o le Malo i le Tamaitai Palemia, fuafuaga alualu mamao o le atinae o le lakapi i Samoa, i se feiloaiga i le vaiaso nei.
Na folasia ai foi e le pulega o le Lakapi Samoa a latou fuafuaga agai atu i le Ipu o le Lalolagi o le 2027 o le a faia i Ausetalia.
I se pepa o faasalalauga mai le ofisa o faamatalaga a le Malo o loo ta’ua ai, sa faamamafa e le Tamaitai Palemia le afioga Fiame Naomi Mata’afa i lea feiloaiga le tulaga tāua o le sao o taaloga i le fesootaiga ma le soifuaga o tagata i le itu i le atinae o le tamaoaiga.
O loo matamata tetele lea tulaga taua e pei ona faailoa e le palemia i le sao o au lakapi 15 ma le taitoafitu a le Manu Samoa i tausinioga faavaomalo.
Sa mafai i le feiloaiga lea ona folasia ai e le Tamaitai Palemia le faamoemoe o le Malo ua faatuina ai le Matagaluega o taaloga le Ministry of Sports and Recreation o se fuafuaga tāua a le Malo i le taumafai e siitia le tulaga auai o tupulaga i taaloga eseese ma ia maualuga le tulaga e tausinio iai.
Na faaleo ai le faamalo a le Palemia i taumafaiga a le Lakapi Samoa aemaise o luitau o feagai ma lea foi taaloga i le atunuu, ma ave ai lana luitau e faaauau pea le tinou ma le filiga o le pulega o le lakapi a le atunuu i le unaia o le atinae o le taaloga auā alo ma fanau lalovaoa a Samoa mo nei ma le lumanai.
Sa afea ai i le feiloaiga a le taitai o le malo ma sui o le pulega o le Lakapi Samoa nisi o fuafuaga e pei o le fausia o se malaetaalo mo taaloga i le tatou motu o Savaii.
