O le sauniga faalemalo o le faamanatuina o le iupeli taimane o le tatou tuto’atasi o lenei tausaga, sa molimauina ai mo le taimi muamua i tiute ma galuega a Malu o le Malo i aso faailogaina faapea, le to’atele o tamaitai leoleo ua auai i le Tulai Faaaloalo o se vaaiga e sili ona mata’ina i le silasila ma le maimoa a ta’ita’i o le Malo ma le atunuu, ae o se tu faaaloalo i galuega tau malosi faafitafita ma galuega faaleoleo.

O se taimi muamua foi lea ua ta’ita’i ai se tamaitai leoleo i le tulai faaaloalo auā o le tele o tausaga i tuto’atasi ma isi sauniga faalemalo o le itupa lava o alii e ta’ita’ia tulai faaaloalo ma sa na o tama tane foi e faatinoina le tulai faaaloalo.

Ua faaopoopo i le suiga na vaaia i le tulai faaaloalo a Malu o le Malo o le tuto’atasi o le 2022, le avea ai o le uluai tamaitai Palemia o Samoa ma le Pasefika na te sisiina le tagavai poo le fu’a o le Malo Tuto’atasi o Samoa, ua pulea lava e ona tagata ana faigamalo.