A o tālia ai faamaumauga mai le ofisa o numera faamaumauina mo se aofa’iga o turisi ma tagata tafafao na afea Samoa i le masina na te’a nei o Aokuso, o lea ua faailoa i faamaumauga mo le masina o Iulai na amata ai le tausaga faaletupe fou o loo faagasolo, e maoa’e le numera o tagata tafafao mai fafo na afea le atunuu i totonu o lea masina.
E 24,596 tagata mai fafo na malaga mai ai i Samoa ma o se faaopoopoga e 11 tesimale 1 pasene.
E fua lea siitia o le numera o tagata malaga mai fafo i le 24,134 na afea le atunuu i le masina o Iuni o le tausaga nei lava.
E iai le talitonuga o ia faamaumauga ma fuainumera o tagata mai fafo e taunuu mai poo arrivals, o le a faaauau pea ona siitia, aemaise lava o le aga’i atu i le faai’uga o le masina lona iva lenei o le tausaga, aga’i atu i le masina fou o Oketopa o le a afea ai Samoa e usugafono mo le Fono a Malo o le Taupulega.
