A o faasolo ai le galuega a le matagaluega o le soifua maloloina e fana ia mamate namu i nofoaga o le talafatai o Apia e agai atu i Leulumoega, o loo toatele ai tagata ua maua i le vairusi o le fiva ponaivi le dengue fever.

O faamaumauga lata mai a le matagaluega o le soifua maloloina ua faailoa ai le faaauau pea ona faaopoopo le numera o tagata ua mama’i ai.

I le 216 sa faamauina muamua ua faaopoopo le 34 o gasegase fou ma ua silia ai nei i le 250 tagata ua aafia.

O le fuainumera lea sa faamauina talu mai le aso 24 o Aperila, ae o lea ua amata le masina fou o Me ma siitia ai pea le numera o gasegase o le fiva ponaivi.

O loo tuua aoga mo le vaituuaga masani lenei o le tausaga, ua fetaui lelei ma le galuega o loo fana ai nisi o lotoā o aoga i le taulaga, o loo tele ai tagata ua maua i le gasegase.

O le kalafi o faamaumauga a le soifua maloloina o loo faailoa ai e pito maualuga lava le numera o fanau mai le matutua o le 5 i le 9 tausaga, 10 i le 19 o loo aafia, faapea le tupulaga matutua mai 20 i le 29 tausaga le matutua ua maua i le vairusi, faapea le au tino i matutua mai le 60 i le 69 tausaga o le soifua ua maua i le dengue fever le fiva o ponaivi.

O tainamu ma tulinamu faapea spray e fana ai le tino ia sosola ese ai namu o loo fautuaina e faaaogā mo puipuiga.

O le faamamā foi o le laufanua i le aveese o otaota ma lapisi o loo nonofo ma tautuufua ai namu, o le tasi lea o puipuiga sili ona lelei.