O le malaga mulimuli a le Lady Samoa IV mai Apia mo Pago Pago i le vaiaso nei, o le a muta ai ma le totogi o pasese o loo iai i le taimi nei, auā o le masina fou o Oketopa e amata ai le siitaga fou o pasese ua faamaonia i se faaiuga a le Kapeneta.

O lea siitaga e le gata mo tagata matutua ae o fanau mai le 2 i le 12 tausaga le matutua.

Ua faailoa e le faalapotopotoga o vaa a Samoa o le siitaga fou o pasese ma uta feaveai i le va o Samoa e lua e faatino auaua’i amata i le masina fou, o Iulai o le tausaga fou 2024 ma Iulai o le tausaga e sosoo ai 2025.

E le gata ina aofia i le siitaga totogi o pasese ma uta mai Apia i Pago Pago ae faapea foi i malaga mai Amerika Samoa agai mai i lenei itu o Samoa.

I le taimi nei o le totogi o le pasese o le tagata matua i le alu i Amerika Samoa ma toe foi mai e 120 tala.

O le masina fou o le a siitia i le 140 tala, o Iulai o le tausaga fou o le a 164 tala ma Iulai o le tausaga 2025 o le a 180 tala.

O fanau i le va o le 2 ma le 12 tausaga le matutua o le taimi nei i le pasese i le alu ma le foi mai i Apia e 75 tala, o le siitaga fou i le masina o Oketopa e 88 tala, o Iulai o le tausaga 2024 o le a 102 tala ma le siitaga ia Iulai o le tausaga 2025 o le a 112 tala.

O fanau ua lua tausaga le matutua o le taimi o loo 35 tala le pasese i le alu ma le foi mai i Apia, ae o le siitaga i le masina fou o Oketopa o le a 41 tala, siitaga ia Iulai o le tausaga fou e 48 tala ma le siitaga o le latou pasese ia Iulai o le tausaga e 2025 o le a 52 tala.

Ua siitia foi le totogi o uta ma faamomoli feaveai i le va o motu, e lē gata o taga talo, popo ma isi meaai taumafa mata, ae faapena foi i afifi ma taui toga faapea pailate o loo ave ai nisi uta ma faamomoli.