Ua faamauina nei i le talafaasolopito o faagatama o tuuga fautasi a le atunuu, le tulai mai o le fautasi a le Tolotolo o Tamauli, o le Siamupini lea o Faagatama i le Tai o tuuga fautasi, mo le faamanatuina o le 60 tausaga talu ona Tutoatasi Samoa, e pei ona faaiuiu ai i le masina lenei o Me.
O le Tolotolo o Tamauli o le Sa mai le afioaga o Salelologa i le motu tele i Salafai, ma e na o le pau foi lea o le fautasi mai Salafai na tauva i lenei tauvaga, i lalo o le taitaiga faa-Kapeteni a le alii faipisinisi, le Fetalaiga Pauli Ivan Williams.
O le tulaga lua ua tulai mai ai le fautasi a le Aoga a le Matata Eseese a le Ekalesia Katoliko, le Don Bosco i Alafua, lea na aloina lava e nisi o tamaaoga ma tama tuai o le kolisi, ae kapeteniina e le tamaitai e toatasi sa filo ai lava i le kapeteniina o se fautasi i nei lava faagatama i le tai, le Afioga Vaimasenuu Zita Martel.
O le fautasi mai le Aiga i le Tai, le afioga o Faleu i Manono, le Telefoni o le Vainuu, ua tulaga tolu ina ua faatini le tuuga, e ui o le sa lea na faaoso i le amataga mai o le tuuga, ma sa kapeteniina e le afioga i le alii loia, le Afioga Leiataualesa Jerry Brunt.
Ina ua mae’a ona faia le seiga pepa a kapeteni o fautasi e lima o le a tutuu mai gataifale o Faleula ae tini i gataifale o Apia ina ua faia le feiloaiga mulimuli a le soa komiti o tuuga vaa ma kapeteni.
O lea la sa faatulaga mai ai o le Telefoni o le Vainuu i le laina numera tasi, numera lua o le Sa o le Don Bosco, o le Tolotolo o Tamauli i le numera tolu, numera fā o le fautasi a le Malisi, ma le lona lima o le Littlerina mai Toamua.
O tuutuuga o le tauvaga e pei ona sa faailoa i kapeteni, e tatau ona taunuu i le tini le sa manumalo i totonu o le 50 minute ma e tatau ona faamalieina lea aiaiga.
E manino mai i lea aiaiga, e lē taulia le fautasi e tini ae silia i le 50 minute; e lei maua mai la se tala pe na ausia e le fautasi na manumalo lea aiaiga.
E $60 afe le manumalo o le Sa o le a sola ma le siamupini o faaagatama i le tai i polokalame o le taualuga o le faamanatuina o le 60 tausaga o le tutoatasi lea e faaiuina i le Aso Lulu o le vaiaso fou, a o lumanai ai le Aso Tofi le aso muamua o Iuni e sami ai le aulia o le 61 tausaga o le tatou Malo Tutoatasi.
