Ua siamupini le Laulelei o Amoa mai Saipipi i le Liki Kirikiti Samoa o le Teuila o lenei tausaga, ina ua malolo ai le Tanifa o le Vao mai le afioaga o Sili i le sailiga siamupini.
Na faailoa e le faatamā o le komiti mo le Kirikiti Samoa le Afioga Laaulialemalietoa Leuatea Polotaivao Fosi Schmidt o lenei lava faamoemoe o le taumafai ina ia lalaga pea le kirikiti a Samoa lava ia na masani mai ai ua tauau ina mou atu.
O le Ipu o le Siamupini ma le Talita na saunia e le SSAB faatasi ai ma le seleni e $5,000 le faailoga o le manumalo.
Ua fā tausaga o umia e le ‘au a le Tanifa o le Vao mai le afioaga o Sili le siamupini, ae o lea ua see atu i le Laulelei o Amoa le Siamupini.
O le tulaga tolu na maua lea e le ‘au e tasi mai Upolu i le afioaga o Falefa o le Uso Fealofani.
Na latou maua le ipu ma le faailoga tupe e $3,000.
Ma le tulaga fā na maua lea e Tama o le Faifaimālie mai Vaipu’a, o le faailoga o le ipu ma le faailoga tupe e $1,000.
