Ua amata ona selesele e le mafutaga o le aumaga a le afioaga o Vaiafai i Iva i Savaii faamanuiaga tau seleni mai le latou taumafaiga tau pisinisi, o le faamamāina o fanua o aiga o le nuu, ina ua talia e le Toomaga mo ē Puapuagatia le latou talosaga ma maua ai se fesoasoani o masini moa vao, ‘ili afi, ma isi meafaigaluega.

O le polokalame o le tetee atu i sauaga i totonu o aiga na faaauala ai le talosaga i le Toomaga o se faalapotopotoga ua galulue faatasi ma le Malo i le unaia o polokalame e auai le itupa o tama ma taulelea o nuu, e taofia sauaga i totonu o aiga.

O se pepa o faamatalaga mai le faalapotopotoga o le Toomaga mo ē Puapuagatia, ua faailoa ai e le Peresetene le faletua o Siliniu Lina Chang, o le faafetai lea i le Malo ua tauala atu ai se vaegatupe ua faaaoga e faatino ai le polokalame, i le sini autu ia malupuipuia tina ma tamaitai ma alo teine laiti mai sauaga.

O le molimau a le peresetene o le faalapotopotoga o masini ma meafaigaluega ua tuuina atu i le aumaga a Vaiafai, ua fesoasoani tele i le maua o ni galuega e faamamā ai laufanua o aiga o le nuu i se totogi feololo, ae tafe atu seleni ma atiina ae ai le mafutaga a le aumaga ona toe foi lea o ia seleni i o latou aiga e faatupe ai isi manaoga.