O loo tālia nei le taimi e fono ai le faafaletui o le vaega e puipuia aiātatau a tagata, ona faatoa faailoa lautele lea o sui tauva o lea pati faaupufai mo palota laiti a itumalo palota o Vaa o Fonoti, Siumu, ma Faleata 4.
O le feiloaiga masani i Aso Tofi a tusitala ma le taitai o lea vaega faaupufai na tuliloa ai i fesili le ta’ita’i po ua iai ni o latou sui tauva mo ia palota laiti.
Le susuga Tuilaepa L Sailele Malielegaoi i le feiloaiga ma tusitala.
Ua molimauina i fesootaiga televavave faaonapo nei le social media le alu o faasalalauga faalauiloa a le vaega faaupufai o le Faatuatua i le Atua Samoa ua Tasi ua faalauiloa ai o latou sui tauva e toatolu le tofa Ale Vena Ale mo le itumalo o Faleata 4, Mau’u Siaosi Puepuemai mo le itumalo o Vaa o Fonoti, ma le tofa Tuu’u Anasii Leota mo le itumalo o Siumu.
O loo faagasolo le galuega a le ofisa o le komisi o faigāpalota mo le lesitalaina o tagata palota mo ia itumalo, ma o se galuega ua faatulaga e mae’a i le aso 18 o le masina nei o Aokuso, ona tapunia lē tumau ai lea o lola palota a ia itumalo mo le sauni atu i palota laiti i se aso o le a faasilasila mai e le ofisa o le komisi o faigāpalota.
