Ua faamanino mai e le Afioga i le Tamaitai Palemia nisi o suiga i laasaga mo le atunuu ua autasi iai ma faai’ugafonoina e le Kapeneta i le asō. O le a see atu nei Samoa i le laasaga 1 (lanu samasama) mo le 4 vaiaso.
Faailoa e le Afioga Fiame Naomi Mataafa e afua atu lea suiga i le vaeluaga o le po o le Aso Lua 31 o Me 2022 seia oo i le vaeluaga o le po o le aso 28 o Iuni 2022.
O nisi o vaega ua toe fetuunai i lalo o le laasaga muamua e aofia ai:
* Tatalaina o pisinisi ma faleoloa uma i itula tatala masani i aso taitasi o le vaiaso e aofia ai ma le Aso Sa
* Faataga o le feoai o tamaiti e i lalo ifo o le 5 tausaga le matutua i nofoaga faitele, ae ia mulimulitaia puipuiga faalesoifua maloloina
* Fetuunaiga o aiaiga mo vaa fagota e puipui i le uafu i Matautu e mafai ai ona agai ese auvaa i le pa’u mātū mo sina taimi a o la’ueseina uta o vaa ma toe tapena mo le toe agai atu i fagotaga pe afai e faamalieina aiaiga faasoifua maloloina
* Amatalia o faigamalaga i aso taitasi i le vaiaso i le va o Samoa e lua
* Faaauau ona faatino su’ega mo le faama’i mo i latou uma e taunuu atu i le atunuu ma tatala loa i o latou aiga
* Unaia pea puipuiga faasoifua maloloina mo le puipuiga lautele e pei o le faia o tali fofoga, tūtū vāvā ma le tausia lelei o le soifua maloloina
O le vaiaso nei o le a amata ai ona toe foi fanau aoga a aoga tulagalua a o faasolosolo ai pea le taimi e a’e ai fanau aoga uma a le atunuu. O le masina o Iulai o le a a’e ai loa aoga amata.
