Ua oo i le motu o Savaii le asiasiga a le Komiti Faatonu o le poloketi tasi le miliona tala a le Malo e pei ona afea ai e le Komiti Faatonu nuu ma afioaga o itumalo palota e 20 i Salafai, i le fia molimauina o atinae ua faatino i le mae’a faamatuu atu o le miliona tala muamua mo itumalo palota e 51.

O le molimau a le Minisita o le Matagaluega o Tina ma Tamaitai, Atinae o Afioaga ma Agafesootai o loo vaaia le poloketi, e iai itumalo o loo latou talisapaia le atinae ma faafetaia le Malo, ae e iai foi itumalo e lē o iai se loto faafetai.

Na faailoa e le Minisita le afioga Mulipola Anarosa Ale Molioo i le polokalame o le Soalepule, o le itumalo o Falelatai ma Samatau sa ave le selau afe tala mo le faleaoga o Samatau, peitai ina ua mae’a ona asia e le komiti lea galuega, sa mulimuli atu ai ma ni faaseā ua tuua’ia ai le faigamalo i le seleni na maua mo lea faleaoga.

Ua faaalia foi e le minisita e tatau ona faafetaia le poloketi e nuu ua maua ni seleni faapea  mo ni galuega tetele, auā o le auga atoa ia fai ma se sao o le nuu e saili fesoasoani e faalava a’i se galuega faapei o se faleaoga.

E 31 itumalo palota i Upolu na asia muamua e le Komiti Faatonu o le poloketi tasi le miliona, ma o sui o lea komiti ua aofia ai nisi o minisita o le Kapeneta.