O le Aso Tofi na lagonaina ai leo eseese ma lanu a le Pasefika, i le Dubai Expo City, ina ua tatala aloaia le Moana Blue Pacific Pavilion ma le Pacific Coordination Delegation Office i le COP28.
Sa faafiafia atunuu eseese o le Pasefika ia latou lava siva ma teuga, e pei ona faafiafia ai foi le tamaitai o le tausala o Samoa, Miss Samoa, Moemoana Safaato’a Schwenke, i lana sausaunoaga i ana teuga faataupou Samoa.
I le sauniga o le tatalaina o lenei fonotaga, sa auai taitai o le Pasefika, o ofisa o malo, sui aloaia o malo, o CSO’s, o talavou ma vaega tuma’oti.
O le a faaaogā le Pavilion e api ai sui usofono uma mai le Pasefika i le taimi o loo faagasolo ai le COP28 ma o le a avea le Coordination Office ma nofoaga e agai i ai taitai o le Pasefika, o i latou o loo faia feutana’iga ma a latou paaga ina ia faatulaga ni fuafuaga ma faatautaia ai a latou talanoaga.
O le Moana Blue Pacific Pavilion i le COP28 o se faiga paaga a le Pasefika ma Aotearoa Niu Sila ma Ausetalia o loo puleaina e le Secretariat o le Pacific Regional Environment Programme (SPREP), ma o lenei fonotaga o loo tutu faatasi ai taitai o le Pasefika ina ia tasi le leo e alagaina ai le galulue faatasi e saili auala e tetee atu ai ma puipuia atunuu uma o le Pasefika mai aafiaga o le tau.
O lenei fonotaga o loo usuia i Dubai, o se atunuu Arapi, mai le aso 30 Novema e oo i le aso 12 Tesema 2023.
