Ua saunoa le Palemia o Niu Sila Chris Hipkins o le Pasefika ua faasolo ina faaitiitia le tulaga saogalemu a o faaauau pea le unai mai a Saina.

O le faamatalaga lea e pei ona lipotia i le aso ananafi ina ua ia faataatia nisi o manaoga o le atunuu i le galulue faatasi ai ma paaga e pei o Beijing.

O le fonotaga o loo faia i Aukilani le China Business Summit ua faia ai ia faamatalaga a le alii Palemia ma ta’ua ai e iai foi lu’itau e feagai ma atunuu e pei o Niu Sila ma e faamoemoe lava i tulaga o tulafono faavaomalo ma le saogalemu o le itulagi.

Ua faia lea lauga a Hipkins ae lei atoa se masina talu ona toe foi ane mai se malaga i Saina, lana paaga numera tasi i fefaatauaiga lea foi sa upuia ai e nisi i le lē faaleoina o nisi o popolega i tulaga tau aiātatau i le mafutaga i le va o atunuu e lua.