Ua saunoa le Palemia  o Niu Sila, Jacinda Ardern i le fonotaga a atumotu o le Pasefika o loo faagasolo nei i Fiti.

I lea lava fonotaga ua saunoa ai foi mai se fesoota’iga i le video le sui peresetene o le malo tele o Amerika, Kamala Harris e faapea o le a faatoluina mai lana fesoasoani mo le faatupeina o mea fia faaleleia tau le tamaoaiga aemaise o le vasa ma o le a oo atu i le 60 miliona i le tausaga mo le isi 10 tausaga o lumanai. 

Fai mai Kamala e ao i le Forum ona tutū faatasi, ua tali mai foi Amerika i le talosaga mai atumotu e pei o Palau e ala i le South Pacific Tuna Treaty. 

O le saunoaga a Ardern ua ia ta’ua ai e ao lava ona galulue faatasi atunuu o le Pasefika aemaise lava foi i mataupu e faatatau i suiga o le tau. Sa ia faatalanoa le tulaga o Niu Sila ma le agavaa faaleoleo ma le Palemia o le Atu Solomona ma Fiti foi i lea lava fonotaga ma ia faamamafa ai i le ta’ita’i o lel atu solomona le tāua o lea sootaga. 

O le vaiaso nei lava ua folafola ai e le faigamalo a Niu Sila le 10 miliona mai le faaputugatupe e 1.3 piliona o le climate aid fund e fesoasoani ai i le faasaoina o fua o faaeleeleaga a le Pasefika ma le su’esu’eina o mataupu tau le tau.