A o alo atu mo toe sauniga o le alii Faipule Samoa ia Faanānā Efeso Collins i le aoauli o le asō, o le fautuaga ua tuuina mai o le vavevave atu.
O lea ua vaiaso talu ona tuumalo Faanānā, ma o itula e 12 i le aoauli nei e amata tatalaina ai faitotoa o le Due Drop Events Centre i Manukau i tagata lautele e fia auai, a o lei amatalia i le itula e 1.
Mai ia i latou o loo faapolokalameina sauniga o le asō, o le itula e 10 i le taeao nei o le a amata faasoasoa ai feoaiga a taavale ina ia mautinoa e sologa lelei pakaga aemaise o feoaiga.
E ese mai le faasoasoa o feoaiga a taavale i le nofoaga o le a faia ai sauniga ae o auala o le a alu ai le solo taavale e aofia ai vaega o Otara ma Otahuhu, poo nuu nei na tupuga ma aumau ai le alii Faipule ma lona aiga.
Ua faamaonia mai foi e leoleo o lea o loo galulue nei ma le aiga ina ia mautinoa e sologa manuia uma fuafuaga ma saogalemu.
Ae i le kolisi na aotauina ma Head Boy ai Faanānā i tausaga ua alu, Tangaroa College, o lea foi o loo fetuutuunai vasega o le asō ina ia mafai ona auai.
