O le ogatotonu o le masina lenei o Iuni o le a faia ai se sauniga faamanatu e manatua ai i latou ua maliliu i le mu o le Loafers Lodge i Ueligitone.
O le faasilasilaga lenei mai le city council a Ueligitone ma e faia i le Cathedral a St Paul i le ‘afa o le lima i le afiafi o le aso 15 o Iuni.
Ua sau ai i le mae’a faamautinoa mai i le Aso Lulu o lea ua maua uma tagata sa nonofo i le hostel i le po na mu ai, ma ua mautinoa ai foi e na o le toalima tagata ua maliliu.
O lea o loo faasolo pea suesuega i le nofoaga o loo iai le fale na mu, ma o loo faamoemoe e mae’a ma tuuina atu i le ofisa o tineimu i le asō.
Ae i le aao foai o tagata e ala i le sailiga seleni o loo faia e le City Mission i Ueligitone e pei ona amatamea ai le pulenuu ia Tory Whanau, e oo mai i le Aso Lulu o lea ua ausia le silia ma le $346,000 ma mai lea aofai o lea ua uma ona faaalu le $71,300 mo fale o tagata aafia, o lavalava faapea talavai.
