O vaa tetele mo tafaoga i le sami, cruise ships o le a amata ona toe ulufale i ogasami o Amerika Samoa e amata atu i le aso muamua o le tausaga fou 2023.

O se fonotaga a le aufaigaluega mo le Koviti-19 i le amataga o le masina nei na faailoa ai le fuafuaga a le malo ina ia faia se faamatalaga e tatala aloaia ai le toe tatalaina o lea auaunaga.

O le faigamalo talu ai sa o latou faia ni vavao tau femalagaa’iga ma o loo faaauau pea e le faigamalo ua iai nei ma aveesea loa ia sā lea o le a mafai ai ona toe faaauau le auaunaga i le atunuu.

Ua faamanino mai la e le faatonu o le American Samoa Visitors Bureau e18 vaa tetele ia o le a afea laueleele o Amerika Samoa i le tausaga fou.

Faafetaia ai e le sui mai lea ofisa o Taimalelagi Minnie le fesoasoani a le matagaluega o le soifua maloloina i le mataupu lea ma le toe tatalaina o tuaoi o le atunuu i le aso muamua o Ianuari 2023 i vaa faapea.

O Amerika Samoa le isi atumotu o le Pasefika ua faatoa toe tatala nei ona laufanua mo ia auaunaga ma ua o latou faailoa ua nofo sauni mo taligamalo ma tagata tafafao asiasi atu i le atunuu.