Ua sauni le faatonu o le leitio faasalalau i luga o upega tafailagi le Samoa Toe Faaolaola e tali lona moliaga ua tuua’ia ai lona faia o ni faasalalauga le sa’o ma le moni ua faaleaga ai ni tagata poo se tagata.

I se fesoota’iga na faatalanoa ai le afioga Tiumalumatua Maifea Fetu o se tamalii e faamautu i Ausetalia ae o loo usufono i le Koneferenisi tele a le Ekalesia Metotisi o loo usuia i le vaiaso nei, na ia faaalia ai ua lē atoa le fiafia i lana usugafono ma lona faletua talu le moliaga ua faia e leoleo, aemaise o le malaga mai i le fonotaga a le ekalesia o le a faauu ai se tasi o ona alo i le tofi faifeau faamaoni ae ua faafeto’ai lona fiafia i le mataupu ua faaulu ai se tagi faasaga ia te ia. 

Ua taofia e leoleo le tusifolau ma pepa malaga o lea tamalii ma saini i le ofisa o leoleo i Faleolo e faatali ai le ma’ea o taualumaga o lona faamasinoga.