Ua talia ma le fiafia e le Tamaitai Minisita fou o Tina ma Tamaitai, Atina’e o Afioaga ma Aga Fesootai, Afioga Mulipola Anarosa Ale Molioo, le suiga ua faia ia te ia e pei ona faailoa e le Tamaitai Palemia i le vaiaso ua mavae atu.
Na ia faailoa i le talanoaga ma le Talamua Media sa o la talanoa ma le Tamaitai Palemia ma o iina na maua ai lona silafia i le tofa sa i le tamaitai Palemia na mafua ai le suiga.
Sa faailoa foi e Mulipola e lei faigofie le taimi na amata ai i le matagaluega o tupe aemaise o le laitiiti o le piriota na tuuina atu e faataatia ai le paketi ina ua ulufale le faigamalo fou.
E ui i tala feavea’i i le suia ai o ia peitai o le talanoaga ma le tamaitai Palemia na ia faailoa ai lona to’a ma le mafanafana i le tulaga ua iai nei le matagaluega o tupe, peitai o le tāua o le Matagaluega o Tina ma Tamaitai ona o le faamoemoega atoa lea o le malo mo ona tagata o lana polomisi e ala i le $1 miliona poloketi, lea o loo tau faamae’a pea nisi itumalo.
Ua ia faailoa e lē faigofie foi le Matagaluega o Tina ma Tamaitai ona o loo faaaliali mai Tina ma Tamaitai peitai o loo nanā ai totonu i ona matafaioi tupulaga talavou, o le fono a nuu aemaise la le miliona poloketi, peitai sa ia faailoa a lelei le va o le Ofisa Sili o Pulega ma lana pulega e vave foi le faaiuga a le Minisita ma tuuina atu i le Kapeneta.
Saunoa Mulipola o loo sosolo lelei lava le faataatiaga o le lumanai manuia o Samoa i ala o le menifesi a le FAST sa tuuina atu.
O le moni o lea faamatalaga na ia faailoa ai le ausia o le tala sa faia e agai mai le faigamalo fou e lē toe faia ni aitalafu, lea lava ua alu ai nei, e lē gata i lea o le ausia ai o le paketi tasi piliona.
I lona finagalo na ia faailoa ai foi e tāua tagata faigaluega a le malo ma e lei faia na o ia ia taumafaiga uma.
Ua ia faailoa o loo tilotilo nei i faafitauli ogaoga o loo to’a ai pea le poloketi miliona i le Matagaluega o Tina ma Tamaitai ae sa ia faafetaia le galuega sa feagai ma le Afioga Leota i le taimi ua tuanai.
O le poloketi miliona ua silia i le 30 itumalo ua faamatuu atu iai, ae o le mataupu i tulaga o loo to’a ai pea lea faamanuiaga mo isi itumalo na saunoa Mulipola e lē mafai e le malo ona o atu ma faamalosia tulaga i mea o loo iai le tofa a itumalo pau lea ia mulimulitaia taiala o lenei poloketi auā le manuia o tagata uma.
Saunoa Mulipola o le tāua lea o le mae’a ane o le lima tausaga ua soo i matagaluega e tolu pe fā e faatupuina ai pea lona malamalama.
